Hippinn

Stundum borgar sig að fara á fjárfestingar fyllerí

Mon, 13 Oct 2008 23:04:13 GMT

Ef þið hefðuð lagt 100.000 krónur í að kaupa hlutabréf Nortel fyrir einu ári síðan væri verðmæti bréfanna í dag um 4.900 krónur.

Hefði sama fjárfesting verið lögð í Enron væri sú eign í dag um 1.650 krónur.

Hefðuð þið keypt bréf í World Com fyrir 100.000 krónur væri minna en 500 kall eftir.

Hefði peningurinn hins vegar verið notaður til að kaupa Egils-bjór fyrir einu ári síðan þá hefði verið hægt að drekka hann allan og fara síðan með dósirnar í endurvinnslu og hafa um 21.400 krónur upp úr því.

Þegar ofangreint er athugað virðist vera vænlegur kostur fyrir fjárfesta að drekka stíft og endurvinna!

Sem dæmi um góðan dag

Sat, 11 Oct 2008 17:00:55 GMT

Má nefna daginn í dag, fuglar himins syngja lífinu lag, þetta syngur vinur minn hann Bjartmar handbremsuhippi á disknum "Ekki barnanna beztur" það er gott að hlusta á hippann þegar loftbóluhagkerfið er sprungið, vísitölufangelsið er orðið að veruleika fyrir löngu, flest okkar erum þar innmúruð, dæmd óskilorðsbundið um ókomin ár, vitum hvorki tíman né sektina þar sem landráðamenn loftbólunnar hafa ekki ákveðið hve þungan dóm Íslenska þjóðin fær fyrir glæp þeirra. En hvað með það fuglar himinsins halda áfram að syngja lífinu lag, sólin skín á réttláta og rangláta, lífshjólið snýst. Ég ætla að hlusta aðeins meira á hann Bjartmar og ráðlegg ég þér að gera slíkt hið sama, textar hans hitta svo í mark þessa dagana, hann er gulls ígildi, ekki hægt að gengisfella hann né ríkisvæða.

Hvað með íslenska námsmenn erlendis?

Fri, 10 Oct 2008 17:58:29 GMT

Ég hef ekki bloggað lengi, enda sést það á síðasta bloggi sem er með landslagi tunglsins svo fjarri er þetta raunveruleika dagsins í dag, ef þetta væru áhyggjur morgundagsins þá vildum við öll glöð skipta. Kreppan sem skollin er á snertir okkur öll og höfum við misjafnar aðstæður til að takast á við vandamál og áföll sem þessu fylgir. En sumum eru allar bjargir bannaðar, námsmenn erlendis eru í alvarlegum vanda, fá ekki að taka innistæður úr bönkum til að greiða húsaleigu, mat eða annað sem fylgir daglegu lífi. Ég á skyldfólk sem er í námi í Danmörku, þaðan eru ekki góðar fréttir, engin leið til að fá fé til daglegra þarfa, þau eru með börn á framfæri sínu og er staðan vægast sagt alvarleg. Við vorum að hugsa um að senda þeim gjaldeyri með því að hafa upp á farþegum til Kaupmannahafnar og biðja þá fyrir þessa peninga þar sem búið er að loka fyrir öll bankaviðskipti milli Íslands og Danmerkur en nú fær enginn gjaldeyri nema framvísa farseðlum, hvað er þá til ráða? Einn af námsmönnum þarna úti var að fá þær upplýsingar að búið væri að loka bankareikningi hennar og millifæra alla peninga hennar til Íslands, þeir vildu ekki skipta lengur með íslensku krónuna eins og staðan væri í dag. Hvert á Íslenskur ríkisborgari að leita í svona vanda?

Fordómar og grimmd

Sun, 27 Jan 2008 23:12:16 GMT

Það er nú ekki á það bætandi að skrifa um lætin í pólitíkinni í Rvk, en ég get ekki annað en lagt inn orð í þá umræðu. Veikind Ólafs F hafa verið dregin inn í umræðuna með afar ósmekklegum hætti, ég hlustaði á Heimir á Bylgjunni morgunin eftir borgarstjórnarskiptin, þar þjarmaði Heimir svo að blessuðum manninum allt vegna þeirra veikinda sem hann hafði átt við að stríða. Síðan hafa fjölmiðlar, andstæðingar og svokallaðir skemmtikraftar gjörsamlega gert allt til að rústa manninum. Ef Ólafur hefði verið að jafna sig eftir hjartaáfall, krabbamein eða annan samfélagslegan viðurkenndan sjúkdóm þá hefði enginn vogað sér slíka framkomu, þá hefði honum verið sýnd bæði virðing og tillitsemi. Hafi einhverntímann átt við að sýna aðgát í nærveru sálar þá er það nú. Sjúkdómur Ólafs var geðrænn, þess vegna leyfir þverskurður þjóðfélagsins að sýna sitt rétta viðhorf og í hnotskurn þá fyrirlitningu, fordóma og grimmd sem geðsjúkum er sýnd árið um kring. En hvað ætli þeir séu margir í borgarstjórn Rvk bæði í minni og meirhluta sem hafa vottorð um geðheilbrigði sitt? Sennilega er það Ólafur einn. Gleymum ekki geðsjúkum og sýnum aðgát i nærveru sálar.

Gleðilegt ár

Sat, 05 Jan 2008 23:39:55 GMT

Þetta er búið að vera löng fjarvera frá bloggheimum en ekki að yfirlögðu ráði. Ég hef virkilega saknað félaga minna á vefnum, þetta sérstaka innlit útlit samband við bloggara kemur í staðinn fyrir kaffisopaheimsóknir heimavinnandi húsmæðra hér áður fyrr, þegar þær skruppu aðeins í heimsókn yfir götuna til Stínu eða Siggu fengu sér einn kaffibolla heyrðu nýjasta bæjarslúðrið áður en þær þutu heim aftur til að setja upp kartöflurnar, þá komu eiginmenn heim í hádegismat, fengu steiktan fisk með laukfeiti, soðnar kartöflur og síðan sætsúpu í eftirrétt. Vaá ég man þá daga, er maður gamall eða kemur þessi fortíðarljómi yfir mann alltaf um áramót? Þá skal maður alltaf fara í einhverskonar uppgjör, eins og það sé ekki nóg að klára bókhaldið í bakaríinu til endurskoðun...þá þarf maður að bæta því á sig að skoða heilt liðið ár 2007!! hvað það gaf og hvað það tók, hvernig stóð ég mig, er sál mín sæl og hjartað sátt??? En árið er liði í aldanna skaut og aldrei það kemur til baka, að sætt sig við það sem ég get ekki breytt er mitt áramótaheit. Kæru vinir ég óska ykkur blóma,ástar og friðar á nýju ári....hippakveðjur Helga

Þá er vefsíðan loksins tilbúin

Tue, 10 Jul 2007 22:51:40 GMT

Þetta var strembinn júní mánuður, þegar verkferlið var ákveðið, hvernig ætti að vista og skrá allar þessar heimildir sem mér hafa borist, þá var ekki eftir neinu að bíða. Ég þurfti að sjálfsögðu að vinna mína vinnu í bakaríinu og hverjum degi en eftir það þá lá mín leið niður á bókasafn því þar var afkastamikill skanni og varð ég mun fljótari að vinna þær myndir þar sem eftir voru. Þannig að 12 stunda vinnudagur samanlagt varð "daglegt brauð" hjá bakarafrúnni. En svo tók við mikið og flókið tæknilegt ferli sem snillingarnir, Daníel, Daði, Jóhanna, Smári og Hlynur Ólafs sáu um, þvílík töfrabrögð og snilld, lærði mikið ....eða vissi nú hve ég kunni lítið. En við höfðum þetta og er slóðin htt://byggdin1973.eyjar.is Þó síðan sé vel á veg komin þá erum við ekki búin að koma öllum upplýsingum inn en þær koma, einnig allar leiðréttingar.

"byggðin undir hrauninu"

Wed, 16 May 2007 19:54:45 GMT

Ég hef ekkert sett neitt nýlega hér inná bloggið um verkefnið "Byggðin undir hrauninu" Það er enn í fullri vinnslu og berast myndir og bréf reglulega. En það sem ég er að vinna í þessa dagana er að skanna þessar myndir í réttri upplausn, við þurfum að hugsa til framtíðar þegar kemur að vistun þessara gagna og heimilda. Við munum vinna hratt og mikið allan júní mánuð til að geta opnað vefinn sem á að hýsa allar þessar heimildir, og er markið sett á goslokahelgina. Þess vegna er ég ekkert að sýna ykkur allt of mikið núna.

Æi æ Eiríkur

Thu, 10 May 2007 22:48:01 GMT

Evrovision verður ekki alveg eins spennandi á laugardaginn fyrst Ísland komst ekki áfram. Eiríkur var mjög góður en bestur var hann Stefán eyjapeyinn sæti sem ættaður er frá Kirkjubæ, sláandi líkur Rabba frænda sínum. En móðir Stefáns er skólasystir okkar Halldórs hún Bára frá Kirkjubæ. Já það má nú segja að árgangurinn sé góður til undaneldis, hvaða árgangar hér geta státað af afkvæmum sínum í Evróvision nema við 1955.

Bakkafjara eða hvað?

Wed, 09 May 2007 18:43:38 GMT

Það fór virkilega um mig að sjá myndbandið sem tekið var á dögunum þegar siglt var upp að Bakkafjöru. Aðstæður þarna voru í meðallagi miðað við veður, sjólag og ölduhæð, en enginn hefði viljað lenda í þessu í myrkri eða snjóbyl, úff! og þetta sem gerðist þarna var 200 metrum fyrir utan áætlaðan varnargarð eða rennu. Eitt hef ég lært af lífinu, það er að hlusta á þá sem eru eldri og reyndari, virða lífsreynslu þeirra, minnast þess að það er til fólk sem farið hefur þennan veg á undan mér og veit hvert leiðin liggur. Ég er sjóhræddur landkrabbi og ætla mér ekki að deila við dómarann í þessum efnum, ef ég á ekki að taka mark á sjómönnum Vestmannaeyja hverjum þá? Miðað við þetta myndband þá er Bakkafjara lognmollu höfn sem nýtist aðeins í bestu veðrum. Æi ekki klúðra þessu, hugsum málið vel og skoðum þetta vandlega. Hvernig fór þetta með sjóvarnargarðinn í Grímsey sem sérfræðingar silgingamálastofnunnar hönnuðu? fór hann ekki í næsta skell? og er nokkuð eftir af honum í dag? Þeir hlustuðu ekki á heimamenn þá.

Tvær ástfangnar flugvélar

Tue, 08 May 2007 08:03:43 GMT

Hjálmar Árnason fráfarandi þingmaður framsóknarflokksins hefur verið ráðinn forstöðumaður fagskólans sem verður á svæði gömlu herstöðvarinnar á Keflavíkurflugvelli "Staða Hjálmars var ekki auglýst og því hafði enginn annar tækifæri til þess að sækjast eftir stöðunni" "En hann var ráðinn vegna þess að reynsla hans á eftir að skipta sköpum" Segir Árni Sigfússon sem verður formaður skólans. En fyrsta verkefni skólans verður að setja á fót flugakademíu.

Þú verður tannlæknir

Sat, 05 May 2007 12:56:44 GMT

Jæja nú er maður hissa....Siv skrifaði undir samning í dag um tannskoðun á 3 og 12 ára börnum, ekki eins og margir halda að þetta séu öll börn í landinu frá 3ja til 12 ára heldur eru þetta bara 2 árgangar eða samtals 8000 börn á landinu sem teljast til þessa aldurs þ.e. 4000 börn á 3ja ára aldri og 4000 börn á 12 ára aldri þau fá samtals 70 millur eða 8.750 kr framsóknar framlag á hvert barn sem tilheyrir þessum úrvalshópi. Hin börnin verða enn að eiga viðskipti við Karíus og Baktus. Maður ætti kansi að prufa að fá ál í tennurnar ef það þyrfti að bora næst. Nóg verður af þeim skít eftir kosningar ef fólk fer ekki að vakna upp af þessari martröð.

Örnámskeið í póstkassanum

Fri, 04 May 2007 18:25:55 GMT

Fékk bækling í póstkassann, Ísland á útsölu! allt á að seljast! Álið er málið fyrir marga, virkjanafíkn er orðin veruleiki. Ég gerði mér alls ekki grein fyrir alvarleika málsins, öll þessi mengun, þennslan sem verður í efnahagslífinu, og þessi hrikalega græðgi sem birtist í tortímingarhvöt um að eyðileggja náttúru Íslands. Ja hérna hér, það er aldeilis ábyrgðarhluti að kjósa í dag.

Í aðdraganda kosninga

Sun, 29 Apr 2007 17:29:19 GMT

Það liggur mér þungt á hjarta sá slæmi aðbúnaður sem er á mörgum deildum Landspítalans, starfsfólk vinnur undir óeðlilegu álagi við óviðunandi aðstæður og sjúklingar eru ekki að fá aðbúnað né þjónustu sem ætti að vera sjálfsögð hjá einni af ríkustu þjóð heims. En af öllum deildum á LSP þá er aðbúnaðurinn sennilega verstur á deild 33C. Ég hef skrifað mjög mörgum þingmönnum og einnig heilbrigðisráðherra en fæ engin svör. En einn frambjóðandi svaraði mér og þó svo að það svar hafi engan veginn verið huggun, skýring eða lausn þá var það þó svar. Ég hef ekki áhuga á að leiða einhvern fram sem sökudólg í þessu máli og engum er það til gagns að hengja einvhern hér, en þið getið skoðað myndir hér máli mínu til sönnunar það verður að gera eitthvað í þessu og það strax, ekki bíða fram yfir kosningar, þeir sem eru við stjórnvölinn núna verða það næsta mánuðinn a.m.k. og fyrst það eru til peningar er þá ekki tími til kominn að fara forgangsraða þarna í heilbrigðiskerfinu og byrja þar sem niðurskurðurinn hefur verið mestur og aðbúnaðurinn verstur. Geðlæknar funduðu nú um helgina og lýsa yfir þungum áhyggjum af fækkun legurúma, sem hefur verið á 10 árum -100 legupláss eða 40% skerðing. En góðu fréttirnar eru þær að í gærkvöldi hafði annar frambjóðandi samband við mig, telur málið alvarlegt og vill gera sitt til að breyta þessu, þar voru engar afsakanir eða tölfræði heldur vandinn viðurkenndur, sá frambjóðandi heitir Árni Johnsen.

Þið getið skoðað fleiri myndir með því að smella Hér

Geðdeild 33C á LSP 17 apríl 2007

Aðbúnaður þingmanna, 24 apríl 2007, sérhönnuð húsgögn, kostnaður 45 milljónir

Húrra fyrir Margo

Thu, 26 Apr 2007 15:08:29 GMT

Margo hefur svo oft fengið mig til að hugsa og staldra við, alltaf fundist við heppin hér í Vestmannaeyjum að fá hana til að setjast hér að. Fer oft ótroðnar slóðir, hún er svo mikill hippi. Síðasta útspil hennar er frábært, nú ætlar hún að gerast "góði hriðirinn" og taka við gömlum hlutum sem hún síðar selur, ágóðinn rennur til góðgerðarmála, og eins og hún orðar sjálf "það sem er fánýti fyrir einum er fjársjóður fyrir öðrum" Margo þetta er tær snilld. Nú er ég að fara taka til í geymslunni hjá mér og þar er ýmislegt sem ég hef ekki tímt að henda, en að geta gefið og það seinna orðið til góðs fyrir aðra.......nú verður sko gaman að taka til í geymslunni. Þökk sé Margo

Velferð fyrir alla

Wed, 25 Apr 2007 00:10:03 GMT

Ég horfði á útsendingu á visir.is af fundi sem þroskahjálp hélt með frambjóðendum allra flokka, skrýtið hve stjórnarflokkarnir lifa í góðu þjóðfélagi en hinir sjá að breytinga er þörf, þó virtust allir vera með á því að "leyfa" öryrkjum og ellilífeyrisþegum að vinna sér inn auka pening án þess að refsa þeim fyrir það. Siv var spurð næstum því beint um geymslu geðsjúkra á úrsér gengnum salernum, hún tönglaðist sífellt á hve þjónustan væri að batna og það væru 30 milljarðar á leiðinni inn í kerfið.... og ekki ætti að vera með það gamaldags úrræði að vista geðsjúka á sjúkrahúsum, þeir ættu að vera heima hjá sér að sækja svo göngudeild....Já nú skil ég það eru þá er enginn geðsjúkur heldur eru þeir allir létt-geggjaðir.